Hanns Scharffenperger, burger zu Wienn, hat versaczt sein haus, gelegen undern Pognérn zu Wienn zenagst Hannsen des Króner haus an aim tail, mit ainem jeuch weingarten, gelegen ze Ottakchrin ob der kirchen genant daz Panczen, daz der stat grunt nicht ist. Dem erbern herren hern Hannsen Slinger, diezeit caplan der ewigen mess die weilnt Caspar Slinger in dem frawnkloster dacz Sant Maria Magdalen vor Schottentor zu Wien zu stifften geschafft hat, und allen seinen nachkomen capplénn derselben mess, umb zwayhundert und virczig phunt Wienner pfening, in solher maynung alle dieweil der egenant Scharffenperger oder sein erben die benant sum pfening innhabent und nicht beczalnt, so sullent sy dem egenanten capplan und seinen nachkómen alle jar davon raihen und dienen sechczehen phunt pfening zu den drein tégen im jar an unser lieben frawn tag, zu der kundung in der vasten, zu sand Johanns tag ze Sunbenden und an sant Merten tag zu yedem tag funf phunt und achczig pfening an abslag des haubtguts mit allen den nuczen und rechten als man solhen dinst in der stat dient und sullent mit dem ersten dinst anheben zu unser frawn tag in der vassten schirist kunftig. Auch ist ze merkhen und sunderlich ausgenomen worden, ob geschéch daz der egenant caplan oder sein nachkomen ain gut vail funden ze kauffen daz der egenanten mess nucz und füglich wer, wen si denn die obgenant sum pfening an den egenanten Scharffenperger oder sein erben vordernt und der nicht lenger peyten wellent, so sullent si in die dann nach solher manung ynner den nagsten drein moneiden ausrichten und beczaln an alles vercziehen und wenn der obgenant caplan oder sein nachkomen die vorgenant sum pfening anlegen wellent daz sullent si alzeit tun und handeln mit des lehenherren der mezz und des obgenanten Casparn Slinger seligen geschéfftleut wissen und willen ungeverlich, ut littera sonat. Actum an Freytag nach sant Scolastica tag, anno etc. xxxviiiio.

Summa ii tl. d.

Nota der sacz ist umbgeschriben folio 146 cum consensu Rechwein.