Hanns Marichvelder, der tischer, und Irmgart, sein hausfraw, habent versaczt ir haus, gelegen in der Kernerstrass zenagst Erharts Glokengiesser haus. Dem erbern Wilhalm Merttinger, burger zu Wien, und seiner vodern hausfrawn Annen, Berchtolts Schuczperger seligen tochter, negsten erben, umb hundert phunt Wiener pfening, und sind herkomen von dem haus gegen dem brobsthof uber datz derselb Merttinger verkauft hat. Und alle dieweil der egenant Marchfelder und sein hausfrau die benanten hundert phunt pfening innhabent, so sullent si dem egenanten Merttinger sein lebttég alle jar davon dienen x tl d. zu den drein tegen im jar an sand Michels tag, zu Weichnachten und an sand Jorgen tag, zu yedem tag iii tl. lxxx d. und wenn der egenant Merttinger mit tod abget, so sullent si dann die benanten hundert pfunt pfening ausrichten und beczaln der obgenanten frawn Annen seligen nagsten erben den datz rechtlich zugebürt nach solhem des Merttinger abgang ynner dem nagsten moneyd anvercziehen, ut littera sonat. Actum an Mitichen vor dem heiligen palm tag, anno etc. xliido.

Summa vi s. xx d.