Eintrag vom 1444-07-17Informationen zum Dokument

Maister Hanns Zeller, lerer in der erczney, und Margreth, sein hausfrau, habent versaczt ir haus, gelegen in der Kernerstrass zu Wienn zenagst Hannsen Marchfelder des tischer haus an aim tail und an dem andern zenagst Erasm Vinkchen des schuster haus, davon man jèrlich dint dem capplan unser fraun altar in Sant Johanns cappellen vor Werdertor iiii tl. d. zu purkrecht und nicht mer. Junkf dem erbern Alexen Newnkircher anstat und zu handen junkfraun Margreten seiner swester und irn erben umb c tl. d. hundert pfund Wienner pfening und umb zehen guldein, die ir weilent maister Erhart Newnkircher der glogkengiesser ir vater seliger geschafft hat nach lautt seins gescheffts, und umb zehen guldein, die ir zu irm tail zugepürt habent von maister Thoman Sibenburger dem goltsmid von ains weingartens wegen an der Dürrn Wéring gelegen, und sind zu beczalen, wan die egnant junkfrau Margret zu irn vogtpérn jarn kúmt oder eelichen verheiratt und zugelegt wirdet, darnach ynner dem nagsten halben jar anvercziehen. Wér aber das sy ungevogte abging, so sullen aus den egnanten hundert pfund pfeningen gevallen derselben junkfraun Margreten anfrawn zwainczig pfund pfening und die achczig pfund auf des egenanten Erharts irs vaters nagst erben, darauf sy dann zurecht erben und gevallen sullen nach lautt des egemelten geschefts dann die egnanten zehen guldein sullen auch erben auf der egnanten junkfrawn Margreten negst erben ungeverlich. Actum an Freitag ante Marie Magdalene, anno etc. xliiiito.

Summa vii s. vi d.

Nota die egenanten x gulden hat er von der egenanten junkfrauen¹ Margreten wegen beczalt und ausgericht Alexen Newnkircher irm pruder nach laut ainer quittung, die maister Hans Zeller von im hat, an Mitichen vor sand Pangreczen tag, anno etc. xlvito

Nota Nota die egenanten c tl. d. hat maister Hans Zeller zu dem puch gelegt zu der egenanten junkfraun Margreten handen und in den rechts, so vorgeschriben stet. Actum ut supra.