Eintrag vom 1444-07-17Informationen zum Dokument

Maister Hanns Zeller, lerer in der erczney, und Margreth, sein hausfrau habent versaczt die uberteurung irs hauss, ganczes gelegen in der Kernerstrass zenagst Hannsen Marchfelder des tischer haus.Uber die vir pfunt pfening gelts purkrechts, die der capplan unser fraun altar in Sand Johanns cappellen vor Werdertor vor darauf hat, und über die hundert pfund pfening und zehen guldein die Alexen Newnkircher, anstat und zu handen junkfraun Margreten seiner swester nach lautt des saczbuchs nachmalen darauf verschriben sein, dem vorgenanten Alexen Newnkircher, auch anstat und zu handen junkfraun Ursulen seiner swester, umb fünfczig pfunt pfening. Davon sol er dieselb Ursulen an abslag irs gelts innhaben ziehen mit speis und gewant versorgen als sein swester uncz sy gevogt wirt und umb zehen guldein die ir zu irm tail zugepurt habent von maister Thoman Sibenburger dem goltsmid von ains weingartens wegen an der Dürrn Wering gelegen und sind die egnanten funfczig pfund pfening und die zehen guldein zu beczalen von dem nagstkunfftigen sant Jacobs tag uber ain jar anvercziehen. Wer aber das die benant junkfraw Ursula mit tod abging ungevogt, so sullen dann die egnanten funfczig pfund pfening ledigclich erben auf den egnanten Alexen irn pruder dann die zehen guldein auf ir nagst erben darauf sy dann zu recht erben und gevallen sullen. Actum an Freitag ante Marie Magdalene, anno etc. xliiiito.

Summa iii s. xxvi d.

Nota die egenanten c. tl. und x gulden hat maister Hans Zeller nach abgang der egenanten junkfraun Ursulen beczalt und ausgericht Alexen Newnkircher irm pruder nach laut ainer quittung die maister Hans Zeller darbei hat, an Mitichen vor Pangracii, anno etc. xlvito.