Hanns Scharffenperger, dieczeit anwalt in der munss, hat versaczt sein Riemhaws mit seiner zugehorung, gelegen mit dem vordern tail am Hohenmarkcht und mit dem hindern im Vischhof zwischen seim zuhaus und Hainreichs Niderhofer haws. Dem erbern weisen Thoman Swarcz, dieczeit des rats und spitalmaister der Burgerspital vor Kérnertor zu Wienn und allen seinen nachkomen spitalmaistern, umb c und v tl. d., die er nach der ersamen weisen · des burgermaisters und des rats erkantnüss dem egnanten spital fur v tl. d. ewigs gelts die das spital nach seiner alten urchund und des egnanten Scharffenperger kauffbrief lautt auf dem egnanten Riemhaus gehabt hat schuldig ist worden, und im derselb rat vergünnt hat abczulosen nach lautt ains statbriefs, den der egenant Scharffenperger darumb hat in solicher maynung das nu furbaser das vorgnant spital die obgnanten c und v tl. d. fur die egnanten v tl. d. ewigs gelts auf dem egnanten riemhaus haben sol und alle dieweil derselb Scharffenperger sein erben oder wer dasselb Riemhaus besiczt die egnanten c und v tl. d. nicht beczalent so sullent sy ainem yeden spitalmaister alle jar davon raihen und dienen v tl. d. zu den zwain tegen im jar halb an sant Jorgen tag und halb an sand Michels tag anvercziehen und sullen mit dem ersten dinst anheben an sand Jorgen tag nagstkunfftig sy haben auch gewalt dieselben v tl. d. gelts purkrechts wider abczukauffen, wenn sy das getun múgen oder wellen miteinander mit den egnanten c und v tl. d. und den nagsten dinst damit, ut littera sonat. Actum an Samstag vor sand Kathrein tag, anno etc. xlvto.

Summa vii s. d.

Das purkrecht ist dem spital wider umb auf dem Riemhaus geschriben nach lautt ains purkrechtbriefs, feria sexta post Floriani, lio.