Eintrag vom 1451-08-13Informationen zum Dokument

Hanns Hirss, burger zu Wienn hat versaczt sein haws mitsambt des newen melgrúb am Newnmarkcht, gelegen zunagst der stat meczengadem, den erbern Andren Schönaich und Hannsen Winkchler, Niclasen Tirman des eisnér seins vorvadern seligen geschefftléuten, anstat und zuhanden Jörgen, desselben Tirmans seligen sun, der noch nicht vogtbér ist, und seinen erben. Umb zwayhundert und sechsundvirczig phunt phening von wegen des guts, so im der egenant Tirman sein vater seliger geschafft hat, also das der egenant Hanns Hirss die benante sum phening innhaben, núczen und niessen und den benanten Jörgen nach innhalt seins vater geschéfft ordenlich innhaben, ziehen, mit allen notdurften versorgen, auch all steúr und ansleg davon ausrichten sol, an abslag des haubtgúts, solanng uncz das derselb Jorg vogtber wirdet. So sol er im dann oder, ob er ungevogter abging, darnach seinen erben die obgenanten sum phening ynner dem nagsten halben jar ausrichten und beczaln an alles vercziehen. Actum an Freytag vor unsers lieben Frawn tag Assumptionis, anno domini etc. limo.

Summa ii tl. d.

Ipse habet cedulam.

Fur die zedl hat er ain versorgnuss geben.

Nota das vorgenant gelt habent geerbt Hannsen des Hirssen kinder nach lautt ir beweisten freuntschaft.