Hanns Meurl und Anna sein hausfrau habent versaczt die uberteurung irs hauss, genant des Fuchsleins haws, gelegen am alten Kolmarkcht zenagst Andren Meichsner des goltsmids haws. Uber die zwayhundert drewunddreissig pfunt und achczig pfening, darumb sy das emalen Casparn Jordaner und Annen seiner hausfraun versaczt habent, nach lautt ains saczbriefs, den sy darumb habent. Den erbern weisen Jorgen Bruntaler und Hannsen Viregken, baid burger zu Wienn, anstat und als gerhaben Jorgen und Achaczen, Hartmans Tannawer seligen sunen und irn erben umb hundert sechsundsechczig pfund fünf schilling und zehen pfening. Und sind zu beczalen von den nagstkunfftigen Weichnachten uber ain ganczes jar und sullen in auch dasselb jar davon raihen und dienn sibenczehen pfunt pfening, zu den drein tégen im jar, zu sant Jorgen tag, zu sand Michels tag und zu Weichnachten, zu yedem tag funf pfund, funf schilling, zehen pfening. Und sullen mit dem ersten dinst anheben von sand Jorgen tag nagstkunftigen uber ain ganczs jar an alles vercziehen, ut littera sonat. Actum an Montag vor unsers Fraun tag der Liechtmess, anno etc. lviio.

Summa vi s. ii d.

Nota der obgenant Achacz ist seine taile haubtguts und dinst der obgenanten sumen ganncz beczalt, ut quittung, die im statpuch geschriben stet. Actum an Phincztag vor dem heiligen Weinachttag, anno etc. lxviimo.