Hanns Kanstorffer, dieczeit des rats der stat zu Wienn hat versaczt die ubertewrung seins hawss, stadl und gerten hinden daran gelegen, mit aller irer zugehorung, in der Weihenpurg gegen Sand Yeronymy uber, daz er von Hannsen Scharffenperger gekauft hat, zenagst Jacoben Menharts haws. Und ain garten, auch daselbs in Weihenpurg hinder der Himelporten gelegen, das vormaln ain haws gewesen und von Giligen und Zacharias, geprudern den Pawmen in kaufsweis an in komen ist, zenagst Hainreichs Refelin haws. Uber die zwaihundert und newnczig phunt phening, darumb er das seinem steufsun Erasem Kieler vor darauf verschriben hat. Der erbern Barbaren, seiner hausfrawn und irn erben umb funfczig phunt phening, die sy auf irs erern manns Hannsen des Kieler haws in der Kernerstrass, oben am egk bey Kernertor gelegen, varmaln gehabt hat. Und sind zu beczalen, wann sy die ervordernt und nicht lenger peiten wellent, darnach ynner den nagsten zwain Moneiden an alles vercziehen. Actum an Freitag sand Elspeten tag¹, anno etc. lviiiio.

Summa iii s. d.

Kyeler habet cedulam.

Nota die vorgenant Barbara hat die schuld mitsambt andern irem gut geschriben dem obgenanten Kanstorffer und sein geschefftlewt habent den sacz ledig gesagt.