Hanns Kanstorffer, dieczeit des rats der stat zu Wienn hat versaczt sein haws, stadl und garten hinden daran, gelegen in der Weihenpurg gegen Sand Yeronimy uber, dacz er von Hannsen Scharffenperger gekaufft hat, zenagst Jacoben Menharts des fleischakcher haws. Und ainen garten, auch daselbs in der Weihenpurgk hinder der Himelporten gelegen, das vormalen ain haws gewesen und von Gilgen und Zacharias, geprudern den Pawmen in kaufsweis an in komen ist, zenagst Hainreichs Refelin haws. Seinem steufsun Erasem Kieler, Hannsen des Kieler seligen sun, der noch nicht vogtper ist, umb zwayhundert und newnczig phunt Wienner phening der swarczen münnss, die demselben Erasem von seins hawss wegen, in der Kernerstrass oben am egk bey Kernertor gelegen, daz im sein vater seliger geschafft hat und der egnant Kanstorffer und sein hausfraw Barbara, desselben Erasem muter als sein gerhaben dem abt zu
Altenburg, verkauft habent, zugepürnt. Und sind zu beczalen, wenn derselb Erasem vogtper wirdet und die ervordert, darnach ynner den nagsten vir wochen anvercziehen. Wér aber daz er ungevogter mit tod abging, so sullen dann die zwaihundert und newnczig phunt phening gevallen auf die benant Barbara sein mutter, nach lautt des obgenanten Kieler seins vaters seligen gescheffts, daz in dem statpuch geschriben stet. Die ir dann auch der egenant Kanstorffer und sein, so es zu solhem val kumbt, ausrichten sullen, wenn sy die vodertt und nicht lenger peiten wil, darnach ynner den nagsten vir wochen an alles vercziehn, ut littera sonat. Actum an Montag sand Elspeten tag, anno domini etc. lviiiio.
Summa viiii s. d.
Nota der vorgenant brief ist in den ratturn gelegt mit ainem gerhabbrief. Der vorgenant Kieler hat den brief hinaus genomen, ut quittung, die im rat ligt, und den sacz ledig gesagt.