Eintrag vom 1459-09-24Informationen zum Dokument

Hanns Gelestorffer hat gemacht die ubertewrung seins hawss, gelegen in der vodern Pekchenstrass zenagst Micheln Schern haws, uber die funfhundert phunt phening haimstewr und morgengab, die er seiner hausfrawn Kathrein vormaln darauf verschriben hat, nach lautt ains briefs, den sy darumb hat. Und uber die zwelf schilling phening ewigs gelts, die abczulosen sind mit zwainunddreissig phunt pheningen, die man jérlich dint dem frumen mann, der die gefangen laitt und tröstt, die man vom leben zum tod pringen wil, an sand Michels tag und nicht mer. Der egenanten Kathrein seiner hausfrawn und irn leiberbern, die sy und der egenant Gelestorffer miteinander gewynnen. Also ist, daz derselb Gelestorffer mit dem tod abget ee denn die vorgenant Kathrey sein hausfraw, so sullen dann sy und er leiberben, so er hinder sein lét, die vorgenant ubertewrung hawss lediclich haben und allen irn frumen damitt schaffen, wie sew des verlust. Wér aber, daz er mit tod abging ee wenn die vorgenant Kathrey sein hausfraw und daz er ir nicht leiberben hinder sein liess, die sy miteinander hieten oder ob es ir leiberben hinder sein liess, die sy miteinander hieten, und daz die auch vor ir abgingen ee wenn sy vogtper wurden und in irn beschaiden jarn komen. So sol dann die vorgenant Kathrey sein hawsfraw die ubertewrung des vorgenanten hawss lediclich und freilich haben und allen irn frumen damit schaffen, wie sew des verlust. Ging sy aber ab mit tod ee dann er, sy haben leiberben miteinander oder nicht, so ist im die ubertewrung des egenanten hawss génczlich wider ledig, ut littera sonat. Actum an Montag vor sand Michels tag, anno domini etc. lviiii.

Summa lxxii d.