Hanns Kellner, mitburger zu Wienn hat versaczt die ubertewrung seins hawss, gelegen in der Ratstrass zenagst des von Pettaw haws, uber die sechsunddreissig phund phening, darumb es vormalen Kristoffen Öczestorffer auch versaczt ist, dem erbern Wilhalmen Purkhawser und Annen seiner hausfrawen umb sechtzig phund phening. In der maynung, das der benant Wilhalmen Purkhawser und Anna sein hausfraw das vorgenant hawss von dem nagstkunftigen sand Michels tag vier ganncze jar nagstnacheinander voligund innhaben, nuczen und nyessen, auch iren frumen die benant zeit darinn hanndeln und thun sullen und mugen. Und sullen dem egenanten Hannsen Kellner jerlich die benanten vier jar ains yeden jars an der vorgenanten sum sechczig phund phening abgen fünf phund phening und die ubermass virtzig phund phening sind zu beczalen nach ausganng der benanten vier jar, darnach inner der nagsten quattember an alles vercziehen. Im hat auch derselb Hanncz Kellner vorbehalten daz stubel und turrhewsel under dem ziegldach, seinen frumen in der vorgenanten zeit darinn ze schaffen, nach seinen notdurfften, wie in verlust an des vorgenanten Purkhawser und Annen seiner hausfrawen und méniclichs von iren wegen irrung und hindernuss ungeverlich. Actum an Mitichen vor dem heiling Phingstag, anno etc. lxvto.

Summa nulla propter officium.