Hanns Schrobenhawer der Tischer mitburger zu Wienn, und Anna sein hausfraw habend versaczt ir haws gelegen in der Wiltbergerstrass zenagst maister Wolfganngen In der Pruch des maler haws, Hennslein Niclasen von Frankhfortt seligen und Kathr(ein) weilent seiner hausfrawen sun, der noch nicht vogtper ist, umb lxxxiii tl. d. die im zugepúrent von seins vaterlichen guts wegen, so im der benant sein vater von allem seinem gelassen gut geschafft hat und im gegen der egenant seiner muter zugetailt und gesprochen sind worden, und sind zubezalen wann der egenant Hennsl vogtper wirdet an alles verziehen nach innhalt des bem[e]lten seins vater seligen geschefft, und sullen auch den benant Hénnslein mit seinen leib und gut innhaben ziehen und mit kosst, gwanntt und ander notdurfft versorgen an abslag seins guts untz das er vogtper wirdet getrewlich und angeverlich. Actum an Mantag vor sand Erasmen tag martiris, anno domini etc. lxvito.

Summa v s. xvi d.

Nota Hanns Schrobenhawers des egenant Schrobenhawers sun hat aus den lxxxiii tl. d. erlangt xl tl. ut littera zum gruntpuch erlegt und die ubermass xliii tl. d. hat Hanns Pewrbekh futrer ingenomen. Actum an Montag vor Maria Magdalene Anno etc. lxxviiii.