Eintrag vom 1469-03-01Informationen zum Dokument

Hanns Inglsteter burger zu Wienn und Agnes sein hausfraw habent verkaufft virtzehen Ungrisch guldein in gold ierlicher gult, auf irm halben hawss mitsamt den gemechen und gemain stukhen so nach lautt der tailbrief dartzu gehorn ganczes gelegen in der Schúlstrass genant der Radeindlin haws zenagst Jorgen Oder haws, das yetz ain Wurss ist, do man von dem ganczen haws ierlich dint der brobstey zu Sand Steffan hie drew phunt phenning zu purkrecht und nicht mer, mitsambt irm haws und hofstat weingarten hinden daran gelegen vor Stubentor das der Schotten grunt ist. Umb zway hundert Ungrisch guldein gerecht in gold und wag, der erwirdigen facultet der juristen hie zu Wienn und allen irn nachkomen. Und sind zu dienn zu den vir quatemern im jar, zu yeder virdhalben guldein und antzeheben zu der quatemer zu phingsten nagstkunfftigen an alles vercziehen. Es ist auch dieselb jargult wieder abzekauffen zu ainer yeden zeit im jar umb die egenanten zway hundert guldein und der nagsten gult damit so davon zu raichen gepúrt ut littera soant. Actum an Mitichen nach dem Suntag Reminiscere in der vasten, anno etc. lxviiii.

Summa i tl. x d.

Nota die obgenannt facultet ist der iic fl. bezalt unnd hat den sacz ledig gesagt, unnd von des briefs wegnn ainen scherm unnd totbrief zum gruntpuch erlegt. Actum an Mittichenn post Invocavit Anno 86. Ex iussu magistri civium et consulatus.