Eintrag vom 1444-03-11Informationen zum Dokument

Jörg Prügkler und Barbara, sein hausfrau, die emalen Lucasen den Vischel seligen auch eelichen gehabt hat, habent versaczt ir haus, gelegen am Kienmarkt am egk zenagst Jörgen von Ernstprunn haus. Umb hundert und newnczig pfunt pfening, den erbern Thoman Töldl und Jeronym Moser, des vorgenanten Lucasen geschefftleuten, anstat und zu hannden Micheln, desselben Lucasen seligen und der egnanten Barbaren sún, der noch nicht vogtpér ist, die demselben knaben zugehorent von dem Rietenhof der da verchaufft ist worden und von anderm erbgut und varundgut so derselb Lucas dem egenanten seinem sun geschafft hat, und sind zu beczalen wan derselb Michel vogtpér wirdet darnach an alles vercziehen. Ging aber derselb Michel mit tod ab ee denn er vogtpér wurde, so sol dann die egenant sumen pfening der obgenanten Barbaren ledigclichen voligen und beleiben nach innhaldung des obgenanten irs manns seligen geschéfft. Es habent auch der egnant Prügkler und sein hausfrau gelobt, das sy den benanten Micheln irn sun dieweil er unvogtpér ist innhaben ziehen verwesen und mit kósst gewant und allen andern seinn notdurfften fursehen versorgen und zu lerung lassen auch solich sein gut versteurn sullen an abslag an all ausczúg ungeverlich, ut littera sonat. Actum an Mittichen vor Oculi in der vassten, anno domini etc. xliiiito.

Summa xii s. xx d.