Jörg Gundagkher der fleischagkher und Anna sein hausfraw habent versaczt die übertewrung irs hawss gelegen zú Wienn, mit dem vordern tail in der Riemerstrass zenagst Rúpprechten Riemer hawss und an dem anndern zenagst ettwenn Symon des Wankher hawss genannt, der Ramhof, und stöst mit dem hindern tail in das Kumpfgässel zenagst des Widhagkher hawss. Über die néwn pfunt pfenning gelts purkrechts, die dem erbern briester hern Sigmunden Halbeiner von Strening, capplan der mess, die fraw Dorothea Niclasen von Tanwalt wittib zu Sand Steffan zú Wienn ze stiften geschaft hat und die der rat zu frawen Elspeten der Rédischerinn mess zugeaignet hat und seinen nachkomen kapplén derselben mess, vorhin darauf verschriben gewesen sind. Junckfrawn Elspeten Hannsen Castler tochter, die noch ungevogt ist¹, sind umb néw[n]zehen pfunt, drey schilling, drey pfenning Wienner münss, die ir von der gesambten hannd wegen so fraw Dorothea Micheln des Tollrer fleischakher hausfraw selige, an dem obgemelten halben hauss gehabt hat, zúgepurt². Und sind zúbeczalen, wann die obgenant junkhfrau Elspet vogtper wirdet anvercziehen. Actum an Mitichen nach Letare in der vassten anno etc. lxiii.

Summa xxxviii d.