Eintrag vom 1470-05-28Informationen zum Dokument

Jorg Kranperger burger zu Wienn hat versaczt sein haws mit aller seiner zugehorung gelegen vor dem Kamerhof zenagst Fridreichs Gsmechl haws an aim tail und an dem andern zenagst Andres von Meran kinder haws mitsambt ainem haws am Graben gelegen zenagst Conraten Reytter des appoteker haws, das Thomans Tengken und seiner hausfrawen Barbaren ist mit gunst willen und wissen derselben Tengken und seiner hausfrawn Barbaren. Dem edeln Jorgen von Gatendorff und den erbern weisen Gregorgen Martendorffer richter und Jorgen Maltpurger dieczeit des rats der stat Prugk an der Leytta an stat und zu hannden Achaczen und Clarn der erbern Elspeten des egenanten Jorgen Kranperger hausfrawn kinder die sy pey weilent irm erern mann Hannsen Frolich burgermaister daselbs zu Prugk an der Leytta elichen gehabt hat der gerhaben sy sein und irn nachkomen gerhaben und derselben kinder nagsten erben umb syben hundert Ungrisch guldein gerecht in gold und wag und sind zu betzallen von dato des saczs uber zehen gancze jar darnach an alles vercziehen, doch hat im der vorgenant Kranperger gwalt vorbehalten. Wann er der vorgenanten hewser ains oder sy baide vor der berurten zeit lasen wil, das sol im ains yeden egenanten jars statgetan werden an widerred. In der maynung das die sum guldein darumb solh ablosung geschiecht den vorgenanten kinden und irn erben widerumb ausgeczaigt und auf genugsamen erbgutern in der stat hie gelegen verschriben werden ut littera sonat. Actum an Montag nach sand Urbans tag Anno etc. lxxmo.

Summa vi tl. d.

Nota der sacz ist umbgeschriben auf des benanten Kranperger hawss ut patet libro novo E fo. 34.