Eintrag vom 1461-12-10Informationen zum Dokument

Kristan Wissinger diezeit des rats Thoman Ekkenperger und Jörg Hofleich burger zu Wienn an stat und als gerhaben junckfraun Margreten Hainreichen Enczesfelder eligen tochter, die noch nicht vogtper ist, habent versaczt derselben junckfrawen Margreten haws, das sy von dem egenant Hainreichen Enczesfelder irem vater seligen erblichen ererbt hat anerstorben ist und gelegen ist in der Goltsmidgassen hie ze Wienn gegen dem Tumbbrosthof über zenagst der Höllczlerin hawss an ainem tail¹ der erbern frawn Margreten des egenant Hainreichen Enczesfelder seligen hausfrawen und Lewpolten des Flöczer seligen tochter und der vorgenant junkfrawen muter die yecz eelichen hat Hannsen den Vogel. Umb drew hundert pfunt pfenning morgengab, die derselben frawen Margreten von dem egenant Hainreichen Enczesfelder irem ereren man seligen anzelegen versprochen sind, und darumb sy untz her unversorgt beliben ist, Also mit ausgenomen wortten das die vorgenant fraw Margret die Vogelin die egenant drew hundert pfunt pfenning morgengab auf dem egenanten hawss mit seiner zugehorung innhaben nutzen und niessen sol unverkumert. Ir lebtteg also solhs saczs morgengab und der stat ze Wienn recht ist und nach irem abgang und tod füllen dann dieselben drew hundert pfunt pfenning morgengab auf dem egenant hawss mit seiner zugehorung innhaben, nuczen und niessen sol unverkumert ir lebtég als solhs saczs morgengab und der stat ze Wienn recht ist und nach irem abgang und tod súllen dann dieselben drew hundert pfunt pfenning morgengab auf dem egenant hawss herunder erben und gevallen auf die egenant junckfrawen Margreten ir tochter oder ob die nicht enwér auf des egenant Hainreichen Enczesfelder seligen nachst erben darauf sy zu recht erben und gevallen sullen an irrung ungeverlich ut littera sonat. Actum an phincztag nach sand Niclas tag Anno domini etc. lxio.

Summa ii ½ tl. d.