Linhart Vorchtenawer kirsner und Anna sein hausfrau habent versaczt ir haws, gelegen im Schiltergésslein gegen Jacobs von Velach haws úber, und zenagst Jacobs Rechwein haws mit der obern seitten, junkfraw Helen irer tochter, die sy mit irm erern mann Thobias dem Munsser seligen gehabt hat, umb newnczig phunt Wienner pfenning, die herkomen sind von dem halben haws vor Stubentor zenagst Arnolts Galander haus gelegen, das in der vorgenant Thobias seliger geschafft hat. Also mit ausgenomen worten ist das die vorgenant junkfraw Helena mit dem tod abget, ee dann die vorgenant Anna ir muter, so sind ir denn die egenant newnczig pfund phenning genczlich ledig worden und auf sey gevallen, allen irn frumen damit zuschaffen. Wér aber das dieselb Anna mit tod abging, ee dann die benante Helen ir tochter, so sol denn dieselb Helena die egnant newnczig pfund phenning auf dem egenant haus lediclich haben und der davon bekomen als solhs saczes, und der stat recht ist, ut littera sonat. Actum an Freitag vor dem heiligen Palmtag, anno domini etc. lmo.

Summa vi s. d.

Nota der egenant junkfrawn Helen saczbrief ligt im ratturn in der langen almar.

Nota der obgenante sacz hat die benant Helene ledig gesagt. Actum an Mitichen post Crucis Anno etc. lxiiii.