Michel Pair der tuchpraitter und Kathrey sein muter habent verschriben und versaczt Ursulen des egnant Pair hausfrauen Hannsen des Pafeser tochter, sechczig pfunt pfenning auf irm Ramhof in der Weihenpurgk gegen sant Yeronius úber und aller seiner zugehorung zenagst Andres Gundorffer hawss gelegen, davon man jerlich dint hincz sant Klarn zu Wienn funf pfunt pfenning zu purkrecht und nicht mer. Also mit ausgenomen worten, das die vorgenant Ursula yecz und hinfur die egnant sechczig pfunt pfenning auf dem egnant irm Ramhof und seiner zugehorung lediclichen und freilichen haben und allen irn frumen damit schaffen machen oder geben sol und mag wie und wem sy verlusst. Wer aber das die vorgenant Ursula mit tod abging und die egnantn sechczig pfunt pfenning auf dem egnant Ramhof unvermacht unverschafft oder unvergeben hinder ir liess, so sullen denn dieselben pfenning erben und gevallen auf ir nagst erben, darauf si zurecht erben und gevallen sullen ut littera sonat. Actum an sant Thomans abent appostoli, anno domini etc. lvito.

Summa ½ tl. d.

Nota das vorgenant purkrecht ist abgelost nach lautt ainer kuntschafft, die im statpuch geschriben stet. Anno domini etc. lxviiiino.