Michel Phuntinaschen hat versaczt sein haws mit seiner zugehorung gelegen im Schiltergesslein zenagst Hannsen Smelcz des seidenvater haws an aim tail, und an dem andern zenagst Hannsen Renharts haws. Der erbern Waltpurgen Steffans Koczler zu Stokhraw tochter seiner hausfraun fur zwaihundert pfund pfenning zurechter haimsteur der hundert und dreissig pfund ir varrlichgut und sibenczig pfund pfenning von irm muterlichen gut herkomen sein und umb drewhundert pfund pfenning zurechter widerlegung derselben haimsteur auch der statrechten zu Wienn ut littera sonat. Actum an Freitag vor dem Suntag Judica in der vasten Anno etc. lviio.

Summa iiii tl. xl d.

Nota der obgenannt satz der zwairerhundert phund phenning haimstewr ist durch die fraun von Toppl geledigt. Nemblich die hundert unnd dreissigk phund durch úbergab Stephans Kötzler unnd die sybntzigk phund phenning mit beraytter betzallung Jacobenn Kyenberger auf seine behabte gericht bey dem púch getan. Lautt aller brieflicher urkund bei dem púch erlegt. Actum am Freytag nach Nativitatis Marie Anno etc. xvc.