Mertt Herczogenperger mitburger ze Wienn hat verkaufft zwelf phunt phenning gelts purkrechts auf seinem hauss gelegen bei Peyrertor am egk zenagst weilent Larenczen Wienner des goltsmids hawss, davon man jerlich dint dem capplan der mess, die Hainreich amm Steg auf der Aindleph tausent Mayd altar in Unser Frawn Cappellen auf der Gstetten hie zu Wienn gestifft hat. Und herrn Petern Humml capplan Sand Anthony altar auf der parkirchen daselbs zú Unser Frawen auf der Stetten und seinen nachkomen auch sechs phund phenning ze purkrecht und nicht mer. Dem erbern Kristoffen Öczesdorffer burger ze Wienn, zú der mess, die er zú Sand Larenczen hie zestifften furgenomen hat und ainem jeden capplan derselben mess der künftiklich darczú genommen wirdet. Umb hundert und zwainczigk phunt phenning. Und sind zú dienn zú drein tagen im jar und den nagsten dinst damit abzelosen mit hundert und zwainczigk phunt phenning miteinander und den nagsten dinst damit anvercziehen ungeverlich ut littera sonat. Actum an Freitag vor sand Jorgentag, anno domini etc. lxiiiio.

Summa i tl. d.

Nota das purkrecht hat Peter Rauscher auf sich genomen und sind gelegt auf sein haws am Salczgries.