Michel Heytl burger zu Wienn und Ursula sein hausfraw habent versaczt junkhfrawn Marthen der yetzgenanten Ursulen tochter, die sy pey Micheln Payrn elichen gehabt hat, irn Ramhof mit seiner zugehorung gelegen in der Weichenpurg gegen Sand Jeronimus uber, umb ainsundsybenczig phunt phening, die ir von desselben Ramhofs mit seiner zugehorung und der varundenhab wegen, so ir der vorgenant ir vater geschafft hat, zugepúren nach lautt seins gescheffts, das im statpuch zu Wienn geschriben stet, und am schacz zedl die zu dem gruntpuch erlegt ist. Sy sullen sey auch innhaben und nach notdurfften versorgen, an abslag irs guts uncz das si vogtper wirdet. Alsdann sullen sy sey derselben irer sum anvertziehen enttrichten. Wér aber das si ungevogt mit tod abgíng, so sol derselben Marthen geschaffter tail gútz als vorstet, der obgenanten irer muter halber tail und der ander halb tail Elspeten Kuntzen Sawser hausfrawn irer swester lediclich voligen nach lautt des obgenanten gescheffts an alles vertziehen ungeverlich. Actum an Montag vor sand Thomans tag appostoli, anno etc. lxviiii.

Summa iiii s. xxii d.