Eintrag vom 1457-05-16Informationen zum Dokument

Niclas Hútstokch der wuntarczt und Kathrey sein hausfraw die emaln Nisclasen von Frankchfort seligen auch eleichen gehabt hat, habent versaczt ir haws gelegen in der Wiltwercherstrass zu Wienn zenagst Wolfgangs Kremser des maler haws. Den erbern Hannsen und Annen der vorgenant Niclasen von Frankchfort seligen und Kathrein weilent seiner hausfrawn kindern, die noch nicht vogtper sind, umb hundert und sechsundsechtzigk phunt phenning lanndeswerung, die in baiden zugepúrnt von írn vaterlichen gúts wegen, so in der benant ir vater seliger an allem seinen gelassenen gut geschafft hat und in auch gegen der egenant Kathrein irer múter zugetailt und gesprochen sind worden. Und wenn dieselben kinder vogtpér werdent, so sullen sy denn yedem seinen tail ausrichten und beczaln an alles vercziehen nach innhaltung des egenant Niclasen von Frankchfort seligen geschefft. Sy sullen auch dieselben kinder nach lautt des geschefftes mit írm leib und gút innhaben ziehen verwesen und mit kost und gewant und allen andern írn notdúrfften versorgen an abslag írs gúts, solang uncz das dieselben kinder vogtper werdent getreulich und ungeverlich als auch das der tailbrief darumb ausgegangen aigentlich innhaltet. Actum an Montag nach sand Pangraczen tag, anno etc. lviimo.

Summa xi s. ii d.