Peter Wéginger hat versaczt sein haus, gelegen am Liechtensteg mit seiner zugehörung zenagst · der Prawninn haus, davon man jerlich dint · dem brobst zu Sant Steffan zu Wienn ain halb pfund pfening zu purkrecht und nicht mer. Der erbern fraun Kathrein, Steffans Lissts burger zu Presspurg hausfraun, die emaln Wolfgangen den Péczolten seligen auch elichen gehabt hat, umb hundert pfund pfening, die ir der benant Péczolt seliger auf dem benanten haus emalen gemacht und verschriben gehabt hat. Also das sy die ir lebttég unverchumert innhaben nüczen und niessen sol als leibgedings und der stat recht ist und nach irm abgang sullen dann dieselben hundert pfund pfening erben und gevallen auf des egenanten Péczolts seligen nagst erben darauf sy dann zurecht erben und gevallen sullen. Auch in der maynung das der egenant Wéginger und sein erben der vorgenanten fraun Kathrein davon raichen und geben sullen auf sant Michels tag nagstkunftig acht pfund pfening an abslag des egenanten haubtguts und sullen ir auch dann zu demselben sant Michels tag die obgenanten hundert pfunt pfening zu der stat gruntpuch hie erlegen das die dann dann wider angelegt und verschriben werden in den rechten so vorbegriffen ist angéver. Beschéch aber das die vorgnant frau Kathrey vor dem tag mit tod abging des got nicht engeb, so sullen sy dann die obgenanten hundert pfunt pfening ausrichten und beczalen des egenanten Péczolts nagsten erben den das rechtlich zugepürt und erweisen das nach der statrechten an all widerred und vercziehen getreulich und ungeverlich, ut littera sonat. Actum an Mittichen vor sant Andres tag, anno etc. xliiio.

Summa vi s. xx d.

Nota daz geltz ist zu dem puch erlegt, feria sexta ante Georii xlvii.