Peter von Nustorff, der sneider zu Wienn, hat versaczt sein haus, gelegen auf dem steig gegen der Prediger kloster uber zenagst Hermans Permans haus. Dem erbern Andren Prew, dem weinkosster zu Wienn, umb xxx tl. d., die emalen auf desselben Andres halben haus gelegen gewesen und sein leibgeding sind. Also das er die sein lebtteg innhaben nüczen und niessen sol unverkumert und nach seinem abgang sullen sy erben und gevallen auf Jorgen, Ulreichs Swiegken des kursner seligen sún, oder ob der nicht enwér darnach auf Ursulen, desselben Jorgen muter seligen nagst erben, darauf sy dann zurecht erben und gevallen sullen. Und alle dieweil der egnant Peter von Nustorff oder sein erben die egnanten xxx tl. d. innhaben, so sullen sy dem egenanten Andre sein lebtteg alle jar davon raichen und dienen iii ½ tl. d. zu den drin tégen im jar ze Weichnachten zu sant Jörgen tag und zu sant Michels tag zu yedem tag viiii s. x d. und nach seinem abgang sullen sy die obgenanten xxx tl. d. ausrichten und beczalen dem egenanten Jorgen oder ob der nicht enwér der vorgenanten Ursulen seiner muter seligen nagsten erben den die rechtlich
zugepürnt und darumb ir beweiste freuntschafft furbringen nach der statrechten, ut littera sonat. Actum an Montag vor sant Niclas tag, anno domini etc. xliiio.
Summa lx d.