Paul Pühler, der koch, mitburger zu Wienn, und Anna, sein hausfraw, die emalen Klausen koch auch eelichen gehabt hat, habend versaczt die ubertewrung irs hauss, gelegen in der Pognerstrass hie ze Wienn zenagst Hannsen Tawhenwegk des kochs hauss an aim tail, uber die funfundsybenczig pfunt pfening, Hainreichen, der benant Annen und irs erern mans Klausen Kochs seligen ir baider sun, vormalen darauf verschriben sein nach lautt des puchs, und uber die siben pfunt pfennig gelts purkrechts, so ain ieder obrister kapplan sand Peters cappellen auf san Peter freyhof gelegen nachmalen darauf hat. Dem erbern maister Berchtolden von Raab dem pader, mitburger ze Wienn, und sein erben, umb hundert guter Ungrisch gulden gericht in gold und wag und sind zùbeczalen halber tail das ist funfczigk gulden auf den suntag nach sand Jacobs tag im snyt nachstkünftigen und funfczigk gulden auf san Mertten tag garnach nagstkünftigen an alles vercziehen, ut littera sonat. Actum an Mitichen vor sand Johannstag ze Súnbenten, anno etc. lxiiio.

Summa i tl. minus viii d.