Peter Angrer und Anna, sein hausfraw, habent verkaufft siben phunt phening Wienner munss gelts purkrechts auf irm hawss, gelegen am Salczgriess innerhalb sand Ruprechts pharhof zenagst der stegen an ainen tail und an dem andern zenagst dem garten der zu dem pharrhof daselbs gehörtt. Umb sechsundfunfftzig phunt Wienner phening, die vormalen auf Thomans Schussler des pogner hawss in der pognerstrass gelegen gewesen sein die man damit darob gelosst hat, dem erbarn priester hern Hannsen von Gotzeraw diezeit capplan der mess so weilent Dietreich Flushartt auf unser frawen altar zu Sand Steffan hie gestifft hat, und seinen nachkomen capplen derselben mess und sind zu dienn zu drein tegen im jare und widerumb abzukauffen miteinander mit sechsundfunfftzig phunt Wienner phening und den nagsten dinst damit, ut littera sonat. Actum an Freitag vor sand Barbara tag, anno etc. lxxiiio.

Summa iii s. xii d.

Nota daz purkrecht ist abgelösst und zum gruntpuch erlegt, ut registro anno etc. lxxvto.