Eintrag vom 1471-09-27Informationen zum Dokument

Steffan Stekh, burger zu Wienn, und Anna, sein hausfraw, habent versatzt ire zway gwantgewelb nebeneinander, under den Kurtzen Tuchlawben zenagst Steffans Hewner gwantgewelb gelegen, und die ödhausung auf den benannten zwain geweliben und stosset an die Newschrann. Dem ersamen priester Hannsen Haslinger, pharrer zu Pharkirchen pey hall in der hofmarch gelegen und dietzeit capplan der mess die Caspar Slinger in dem frawn closter zu Sand Maria Magdalen vor Schottentor zu Wienn zestifften geschafft hat, und seinen nachkomen capplen derselben mess, umb zway hundert und virtzigk phunt Wienner phening. In solher maynung alle die weil sy die bemelten sum phening innhaben und nicht betzalln, so sollen sy dem vorgenanten capplan und seinen nachkomen der bemelten mess alle jar davon raihen und geben sechzehen phunt Wienner phening zu drein tegen in jar zu sand Michels tag, zu unser lieben frawn tag der liechtmess und zu sand Johanns tag ze sunnbenden zu yedem tag funf phunt und achtzig Wienner phening an abslag des egenanten haubttguts und sullen mit dem ersten dinst anheben zu unser lieben frawn tag der liechtmess nagstkunftigen an alles vertziehen. Auch ist sunderlich zu merkhen ob geschets das der egenant capplan oder sein nachkomen ain gut vail finden zekauffen das der obgenanten mess nutz und fuglich wer wann sy die obgenant haubtsumainsten an die die obgenanten kanlewt oder ir erben ervordern und nicht lennger peyten wolden, so sullen sy in nach solher vordrung dieselb haubtsum ynner den nagsten zwain moneiden ausrichten und zu der stat gruntpuch nyderlegen an alles vertziehen, das sy die dann mit wissen der egenanten mess lehenherrn an solh guter die sy darumb kauffen gelegen mugen. Deten aber die obgenanten kaulewt oder ir erben des nicht, so sullen und mugen der egenant capplan und sein nachkomen der obgenanten sum phening von den egenanten zwain gewelbn und der oden hawsung irn furphant bekomen und vor dem statrichter in der burgerschrann darauf klagen als selbs furphants und der stat zu Wienn recht ist, ut littera sonat. Actum an Freitag vor sand Michels tag, anno domini etc. lxximo.

Summa ii tl. d.