Eintrag vom 1465-09-03Informationen zum Dokument

Thoman Swartzpekch, burger zu Wienn, hat versaczt die ubertewrung seins hauss, gelegen in der Vordern Pekchenstrass mit dem vorden tail und mit dem hindern tail in der Hindern Pekchenstrass zenagts Micheln Scher des fleischakcher haus, uber die zwaiunddreissigk phund phennig so vormalen dem mann der armen leüt die zu dem tod gericht werden belaitt. Umb drewhundert phund phening morgengab und widerlegung die Hanns Gelestorffer Kathrein Philippen Wylér zu sand Veit tochter seligen seiner hausfraen die nachmalen den benanten Thoman Swartzpekch auch eelichen gehabt hat gegen den zwainnhundert phund phening haimstewr die derselben Kathrein seiner hausfrau mit abgang desselben irs erern manns Hannsen Gelestorffer seligen tod ledig sind worden vernacht und verschriben het nach lautt ains briefs der nu gantz vernicht und tod ist des vorgenanten Hannsen Gelestorffer seligen nagsten erben wer die sein und sind zubetzalen wann dieselben erben die ervordern und der nicht lenger empern wellent an alles vercziehen ungeverlich. Actum an Eritag nach Egidy Abbatis, anno etc. lxvto.

Summa xx s. d.

Nota die obgenanten iiic tl. d. maringab und widerlegung hat Michel Mayr, fleischakcher, der jungh und Ursula, sein hausfrau, Hannsen Gelesdorffer seligen nagsten erben, wer die seinen auf dem obgenanten haws widerumb verpfennt in mass wie vormallen darauff verschriben gewesen sein. Actum an Mitichen nach Erasmi anno 91.