Eintrag vom 1463-12-14Informationen zum Dokument

Maister Ulreich Griessenpekh, statschreiber zu Wienn, und Anna, sein hausfraw, habend versatzt ir haws, gelegen daselbs zu Wienn am Judenplatz zunagst Micheln Phundtinaschen haws an aim tail und an dem anderen zunagst Herman Mülstain haws. Den erbern weisen Hannsen Hawgen, dietzeit des rats und statkamerer ,und Hannsen Schalauczer, burgeren daselbs zu Wienn, iren hausfrauen und erben, umb hunndert phunndt Wyenner phenning, die herrürent von den zwainhundert phunt phening so Andre Kelhaimer seligen gschefftleutt vor darauf mit recht erlangt haben, und der ain hundert nu betzallt ist und sind die obgenanten hundert phunt phening zu betzallen funfftzigk phunt auf sand Jorgen tag und die anderen funftzigk phunt auf sand Pertelmes tag baid frist nagst nacheinander komend anvercziehen ungeuerlich. Actum an Mitichen nach sand Lucein tag, anno etc. lxiiio.

Summa nulla propter officium

Die obgenanten Hawg und Schalawczer habend cedulam.

Nota der obgenant maister Ulrich Griessenpekh und Anna sein hawsfraw habent an den obgenanten hundert phundt phening darumb ir haws am Judenplatz gelegen versatzt als oben in dem satz geschriben ist den erbern Hannsen Schalawtzer und Hannsen Hawg beczalt und ausgericht l tl. d. ut quittung. Actum an Freitag nach Georgy, anno etc. lxiiiito.

Nota die andern funftzig phunt phening in dem obgemlten sacz begriffen sind dem Schalawtzer Hannsen Hawgen und irn vorgenanten hawsfrauen auch aufgericht und betzalt worden.

Nota die zedl so die obgemelten Hanns Schalanczer und Hanns Hawg des vorgenant satz halben umb die hundert phunt phening aus dem gruntpuch genomen habent ist noch unversert und darumb sy und ir hausfrauen ain tottbrief geben und zu dem puch erlegt habent.