Ulreich Haringseer, der ledrer, mitburger zu Wienn, hat mit willen und nach geschéfft meiner herren Burgermaister und Rats der stat hie zu Wienn versetzt an stat und als gerhab Ulreichs und Appolonia, Hannsen Haringseer des jungern seins vettern seligen kinder, die noch ungevogt sind, derselben kinder haws, gelegen in der Munsserstrass genant des Smerbekchen haws zenagst ettwen Petern Strasser haws an aim tail und an dem andern neben ettwen der Sweygkerin seligen haws und stosset mit dem hindern tail an die prantstat. Dem ersamen weisen Jacoben Starch, dietzeit des rats der stat hie zu Wienn, auch der benanten kinder gerhaben, und seinen erben, umb virhundert und acht Ungrisch guldein in gold und zwazunddreissig phunt funf schilling und ainundtzwaintzig phening, die im die bemelten kinder an redlicher rayttung die vor den egemelten meinen herren burgermaister und rat beschehen ist schuldig worden sein und sind zubetzallen auf den nagstkunftigen sand Michels tag an alles vertziehen ungeverlich. Actum an Mitichen vor dem heiling Phingsttag, anno domini etc lxiiiito.

Summa iii tl. iiii s. xiiii d.