Gilg Waldner, mitburger ze Wienn hat versaczt die übertéwrung seins hawss mit seiner zúgehörung, gelegen in der Münsserstrass zenagst ettwenn Oswalts des Sweygker seligen hawss. Uber die drehundert pfunt pfenning, die von Jórgen Obrechten, Amman seiner hausfraun seligen, die nachmalen den benanten Giligen Waldner auch eelichen gehabt hat, irer morgengab desselben Obrechts nachsten erben vormalen darauf verschriben sind. Und über die vierhundert pfunt pfenning haimstewr und morgengab, die der benant Waldner der egemelten Annen seiner hausfraun, Hannsen des Peyczkofer seligen tochter nachmalen darauf verschriben hat. Hénnslein seinem sún, den er bey derselben Annen seiner hausfrauen seligen eelichen gehabt hat und der noch nicht vogtper ist, umb ainsundvierczigk pfuntt Wienner pfennig, die im von dem erbern Hannsen Peyczkofer, der benanten Annen seiner mútter Seligen prúder seligen, von seiner erblichen gerechtikait wegen an dem hawss, gelegen an dem Alten Kolmarkht zenagst Veinten des plattner hauss an ainer seitten, erblichen angevallen sind. Und sind zú beczalen, wann derselb Hénnsel vogtper wirdet an alles vercziehen ungeverlich. Actum in vigilia Ascensionis Domini, anno eiusdem etc. lxiiio.

Summa lxxxii d.

Nota den obgenanten sacz also in zeschreiben habend die erbern Hanns Kuntstokh, gesworner neger und Symon Haydler, ainer der genanten und baid burger ze Wienn von dem obgenanten Giligen Waldner ausgenommen. Und den mit den heren bei dem púch von seinen negen geschaft zeschreiben Ab auf seine emphelhnist, als sy bei irn trewen an aids stat daruber gesaczt habend, anno etc. et die quomodo supra.