Eintrag vom 1454-11-27Informationen zum Dokument

Hanns Keusch hat versaczt die uberteurung seins hawss und zuhauss, aneinander gelegen am alten Fleischmarkt am egk, zenagst dem gesslein, als man zu Kollner hof get an aim tail. Uber die hundert pfunt pfening, die sein erere hausfrau Agnes die Lempershaimerinn selige zuhilff der messe auf Sand Florians altar zu Sant Steffan geschafft hat, nach lautt irs gescheffts, das in dem statpuch geschriben stet, und auf dem haws mit seiner zuhorung dem caplan der messe vormalen verpfent sein nach lautt des gruntpuchs. Und uber die zwaihundert pfund pfening haimsteur und morgengab, die er Kathrein seiner hausfraun nachmalen darauf verschriben hat nach lautt ains heiratbriefs darumb gegeben, und uber die anderthalbhundert pfunt pfening, die derselben Kathrein von irm erern mann Niclasen Krug seligen morgengab und auch nachmalen darauf verschriben sind nach lautt ains sundern briefs, so darumb ist. Dem erbern Hainreichen Kornmesse, burger zu der Newnstat und seinen erben umb sechshundert pfunt pfening landeswerung. Und daran sol im derselb Keúsch in seinen vassen alle jar ains yeden weinlesens hie zu Wienn aichonetten raihen und geben zehen fuder most, nach seim wert ye zweiwnddreissig emer fur ain fuder zeraitten, oder aber dafur so vil gelts, als ain fuder solichs mosts im lesen daselbs gankch und gewendlichs kaufrecht hat ungeverlich, die dann dem egnanten Keúschen an dem vorgnanten gelt abgen sullen, solang uncz das der egnant Kornmess oder sein erben der vorgnanten sechshundert pfund pfening gancz und gar entrichtt und beczalt werden. Und sullen auch der benant Keúsch und sein erben mit der ersten werung anheben in dem nagstkünfftigen lesen an widerred und an alles vercziehen alles getreulich und getreulich und ungeverlich. Actum an Mittichen vor sand Andres tag Apostoli, anno etc. liiiito.

Habet cedulam.