Hanns Grym der kursner, mitburger zu Wienn und Barbara sein hausfraw habent versaczt ir haws, gelegen in der Schefstrass, daselbs¹ zu Wienn vor Stubentor, zenagst ettwenn Seyfrids des Pinter haws an ainem tail und an dem andern zenagst Wolfgangen Fleischagkhern seligen haws. Dem ersamen geistlichen hern Niclasen Lanngkmanen von Valkenstain, erpen lieben vettern und swagern² und seinen erben oder wem er solhen satz verrer gibt oder schafft umb virczigkh Ungrische guldein, gerecht in gold und wag und umb xxviii tl. d. guter lanndswerung in Osterreich. Und sind zu beczalen alle jar acht Ungrische guldein zu zwain tegen im jar, zu sand Symons und sand Judas tag, und vier Ungrische guldein und zu sand Jorgen tag auch vier guldein, ains yeten jars solang uncz daz sy der obgenanten sumen guldein und phening ganncz beczalt und entricht werden, an alles geverde. Actum an Mitichen nach sand Johanns tag ze sunbenden, anno domini etc. lxvto.

Summa ½ tl. xxiiii d.

Habet cedulam ipse sacerdos.

Nota den sacz habent Jacob Gsmechel und Ulreich Nortzel ledig gesagt an stat des egenanten hern Niclasen und die sacz zedl zum puch pracht, darumb er si gepeten und in das empholhen hat, an sand Scolastica tag.