Eintrag vom 1465-11-20Informationen zum Dokument

Hanns Gold burger ze Wienn hat versaczt die ubertewrung seins hawss gelegen in der Vordern Pekhenstrass amm egk zenagst Fridrichs Gsméchl hawss, das ettwenn des Krewssen gewesen ist an ainn tail und stösset mit dem hinderntail an die padstuben in der Wollzeill, Über die zwayhundert phunt phenning haimstewr, die im die erber fraw Dorothee Hannsen Lanngen selige(n) tochter seine hausfrau zúbracht hat. Und über die drew hundert phundt phenning versaczt ist. ·· Dem erbern ·· Sebastian und Lienharten gebrüdern den Voglwaider burgern ze Krakaw und irn erben, umb tausent gúter Ungrischer guldein gerecht in gold und wag, die sy dem berurten Golden zúe beczalung seiner geltschuld, die er dem von Ellerbach schuldig ist gewesen also berait gelihen habend. Und sind zúbeczalen auf den nachstkúnftigen Unserer lieben frawn tag Assumptionis anvercziehen. Und ob in an der übertewrung des benant hawss umb die tausent Ung(rische) guldein icht abgeen wurd. das sullen und mügen sy haben und bekomen zu von allen andern hab und gút so Hanns Gold obgenant yecz hat oder fúran gewinet nichts ausgenomen ungeverlich. Actum an Mitichen nach sand Elspeten tag anno etc. lxvo.

Summa viiii tl. vii s. v d.

Voglwaider habet cedulam.

Nota den sacz hat der Voglbaider dem Stadler und seinen miterbn ubergebnn und stetn des núz und gwer ut patet libro obligationum k. fo. 67.