Jacob Nadler hat versaczt die ubertewrung seins hawss gelegen hinder sand Pangréczen zenagst Angervelder des messrer haws, davonn man jerlich dint dem kaplan der ewigen mess, die weilent der Thiem auf des Heiligen Krewcz altar zu Sand Michel zu Wienn gestifft hat sechs phunt und sechtzig phenning zu purkrecht und ains stadls gelegen im Räczengraben zenagst Pauln des Hofer haws und stosst an des von Walsse haws, da mann auch von dem egenanten hawss und dem bemelten stadl alle jar dint herren Symon von Bugwicz kaplan der mess, die Anna Stephans Walchpekchen witib hincz Sand Michel gestifft hat aindlef phunt phenning zu purkrecht die abczulösen sind nach lautt ains purkrechtsbriefs und nicht mer
über die virczigk phunt phenning darumb das vorgenant haws und der stadl Stephan dem Awer emalen versaczt sind dem ersamen weisen dem burgermaister und rat der stat zu Wienn umb zehen phunt phening und sind zubeczaln auf sand Kathrein tag nagstkünftigen an vercziehen. Actum an Montag nach sand Michels tag, anno etc. liiio