Eintrag vom 1464-06-08Informationen zum Dokument

Jacob Kraukcher hat versaczt sein gerechtikait, so er hat an dem hawss gelegen am Kienmarkcht zenagst der Heiling Drivaltikait kappeln an aim tail und an dem andern zenagst des Weinperger haws, und des presshaus da entegen uber, zenagst der herren von Gemingk haws, davon man jerlich dint hern Augustin von Rustpach kapplan der ewigen mess, so die Flusthartin dacz Sand Steffan gestifft hat, funfundtzwaintzig phunt phenning zu purkrecht und nicht mer. Junkchfrawn Agnesen Walthesarn des Schifer tochter, des benanten Jacoben Kraukher swester muterhalben, die noch nicht vogtper ist, umb zwayundsechtzig phunt und vier schilling Wienner phenning die ir gevallen und¹ herkomen sind, von der benanten Agnesen gerechtikait, an aim halben so si gehabt hat an aim halben hawss ganczes gelegen am Alten Fleischmarkt, zenagst Fridrichen Mullner des schuester haws, und frawn Anna der Prunnerin verkaufft ist. Und sind zu betzallen wann die obgenant junkchfraw vogtper wirdet an verczichen ungeverlich. Actum an Freitag nach sand Erasems tag, anno etc. lxiiiito.

Summa iiii s. d.

Nota die obgenant summa phenning ist der egenanten junkhfrawn Agnesen verschriben auf des egenant Krautker haws im Sloss gesslein gelegen in Sand Jorgen cappellen im Thumbbrosthof Gruntpuch nach lautt ainer gruntzedeln, die zu dem gegenburtigen gruntpuch erlegt ist. Actum an Freitag nach Dorothe anno etc. lxxi².