Eintrag vom 1463-07-23Informationen zum Dokument

Lorentz Swanntz burger ze Wienn hat versaczt die übertewrung seins hauss gelegen am Hohenmargkt am Silberpühel amm egk, als man an den Kyenmarkht geet zenagst ettwenn Hainrichs Waidhofer Nyderhofer seligen wittib hawss über die zwayhundert gúter newer Ungrischer guldein, darumb es den ersamen weisen ·· dem richter und rat zu Haymburg und irn nachkomen vormalen verschriben gewesen ist nach lautt ains briefs darumb ausgangen. Und über die zwayhundert Ungrischer guldein haimstewr und drew hundert Ungrisch guldein morgengab, darumb es der erbern frawen Affren des benanten Swanntzen hausfrawn nachmalen verschriben ist, nach lautt ains briefs darumb ausgangen. Und hat auch darczu verseczt sein zúhauss gelegen am Hohenmarkht, als man an den Kyenmarkt geet, zenagst dem obgenant seinem hawss, den erbern weisen Hannsen Ernst amm Salczgriess, Merten dem purger und Lienharten Prunnhofer und irn erben umb sechshundert pfunt Wienner pfenning, und sind zubeczalen, wann sy die haben und nicht lennger entperen wellen ungeverlich. Actum an Sambstag vor sand Jacobs tag im snyt, anno etc. lxiiio.

Summa iii tl. d.

Nota der obgnant Mertt purger fur sich selbs und der hochwirdig furst bischoff Wolfgang von Yppomen des egnant Ernst prúder und Thoman Behem x baid desselben Ernst gescheftleut Peter Rachner und Anna sein hausfrau die vormallen den obgnanten Prunnhofer auch elichen gehabt hat, habent den egenanten satz ledig gesagt und umb den ausstand sol desselben Prunnhofer kinden zu irem tail zugepurt haben der vorgenant Rachner und sein Hausfrau derselben kinder muter ainen geltbrif geben und zu der kinder hannden hinder den rat erlegt. Actum an Sambstag vor sand Jorgentag Anno domini etc. lxxiiiio.