Mertt Burger hubschreiber in Osterreich dieczeit des rats der stat zu Wienn und Barbara sein hawsfraw habent versaczt ir haws gelegen am Salczgriess zenagst der Vischerstieg und Petern des Rauscher zuhaws. Dem erbern weisen Stephan Kisling burger daselbs dieczeit ausrichter und volfúrer des geschéffts das fraw Kathrey sein hawsfraw die vormallen Niclasen Burger burger zu Wienn seligen auch eelichen gehabt getan hat, an stat und zu hannden der erbern Annen Hannsen Molter hawsfrawn, umb virhundert phundt phening, darumb man ir ain haws in der stat kauffen sol und sy ir lebtég unverkumert innhaben núczen und niessen und nach irm abgang sol alsdann dasselb haws gevallen auf ire kinder der vorgenanten frawn Kathrein enenkl. Wér aber das die selben ire enenkl vor der yeczgenantten Annen irer tochter ungevogt mit tod abgingen, so sol dann derselben irer tochter dasselb haws lediclich nachvolgen und zusteen allen irn frumen damit ze schaffen wie sey verlust, nach innhalt der obgenanten frawn Kathrein seligen

---

geschéfft das im statpuch zu Wienn geschriben steet. In der maynung das die obgenant Anna Molterin oder ire kinder, so sy vor in mit tod abging das obgenant haws alle dieweil in die obgenanten virhundert phundt phenning nicht angelegt sein als vor stet dafúr innhaben nutzen und niessen sullen und múgen an abslag derselben virhundert phundt phening trewlich und ungeverlich. Und wann das ist, das der obgenant Kisling oder sein nachkomen geschefftléwt des egenanten sacz auf dem egenanten haws nicht lenger haben wellen, so sullen der vorgenant Mertt Burger sein hawsfraw oder sein erben dieselben virhundert phundt phening dem Kisling oder seinen nachkomen geschéfftléwten, wann sy die vordernt darnach über ain gannczs jar ausrichten und in die widerumb an anndern enndten anlegen nach lautt des obgenanten geschéffts. Actum an Eritag nach dem Palmtag, anno domini etc. lxviimo.

Summa iii tl. d.

Kisling habet cedulam.