Paul Degkher, der sneider, burger zu Wienn, und Kathrey, sein hausfraun, habend versaczt ir hawss mit seiner zugehörnung, gelegen am Newnmarkht zenagst weilent Stephans Leyttner des stainmessen hawss. Wolfgangen, Hannsen und Larentzen, Hannsen Hyrssen des eysner burger zu Wienn sun, iren prudern und swegern, umb hundert vierundachtzig phund und vier schillingen phening, die von Jorgen, Niclasen Tremans seligen sun der benanten Kathrein Delherinn pruder muterhalben, erblichen an die benanten Wolfgangen, Hannsen und Larentzen ire geschwisternd komen und in vormalen auf dem obgenanten hawss mit seiner zugehornung auch verschriben gewesen sind, und sind zubezalen wann sy vogtper werden und zu irn beschaiden jaren komen oder ob sy ungevogt mit tod abgiengen iren nagsten erben nach lautt ains saczgeltbriefs. Actum an Mitichen vor Gotzlaichnambs tag, anno domini etc. lxvito.

Summa xii s. viiii d.