Stephan Greiffendorffer, der leinbater, mitburger zu Wienn, und Clara, sein hausfraw, habent verchauft sechs pfunt pfening gelts purkrechtz auf irm haws, gelegen dasselbs bei dem Judenplatz und der padstuben genant zu den Rorn zenagst der Ganitzerin haus an aim tail, davon man jèrlich dint hern Hannsen, diezeit caplan Sant Kathrein altar in dem Dewtschen haus zu Wienn, xii s. d. ze purkrecht und nicht mer. Umb xlviii tl. Wiener d., und sind emaln gelegen gewesen auf Petern des Endl haws in der Schefstrazz, dem erbern Gabriel Gresenperger, dieczeit kirchmaister Sant Michels kirchen zu Wien, und sein nachkomen und gehornt zu Lewpolts des Prunner jartag so im ain kirchmaister daselbs begen sol in der Beschaidenhait datz der selben sechs pfunt gelts jerlich gevallen sullen zway phunt zu der frumezz auf des heiligen krewtz altar und zway pfunt zu dem jartag den man dem egenanten Lewpolten begen sol des nagsten suntags nach sand Stephans tag im snit mit xxx messen. Also daz yedem herrn die dieselb mess sprechen gevallen sullen viii d. dem kirchmaister umb kertzen und andere notdurft lx d. dem pfarrer lx d. den drein gesellen yedm xx d. dem schulmaister xx d. dem guster xxiiii d. dem korschuler daz er die schuler zu den messen ausricht x d. und dem porknecht ii d. und daz pfunt geltz hat der vorgenanten Lewpolt geordent datz man all jar davone kauffen und haben sol zu der egenanten frumezz teglich dabei stekchertz der yegliche ain virdung wachs hab und zwo wandlung kerczen der yede ain pfunt wachs hab daz man die frumezz teglich dabei verwest auch sol man von demselben pfunt gelts kauffen und haben alle jar ain stekkerzn von i tl. wachs die alle jar prynn sol von vesperzeit an sand Michels abend uber nacht untz an sand Michels tag daz man daz früambt singt vor Sand Michels pild dasselbs
dann das secht pfunt geltzs hat der vorgenant Leupolt geordent das alle jar gevalt dem pfarrer zu Sand Michel und den drein geselln yeglichn besundlich lx d. das es uber in pryn wen man predigt oder mit gotzleichnam get an underlas und ist sind die egenanten sechs pfunt geltz purkrecht zu dienen zu drin tegen und wider abzekauffen miteinander und den nagsten dinst damit, ut littera sonat. Actum an Mitichen vor sand Thomas tag apostoli, anno etc. xliiio.
Summa iii s. vi d.
Das purkrecht ist abgelost und zu dem puch gelegt, feria secunda ante Corporis Christi anno etc. xliiiivo.