Sigmund Gwaltshofer, burger zu Wienn, hat versaczt sein hawss mit aller seiner zugehornung, gelegen in der Münsserstrass zenagst maister Jacoben Wuntarczt hawss h an ainem tail und an den andern zenagst der Michelpergerinn und irer miterben hawss und stosset hinden an den Liechtensteg an Marthesen Pewtler hawss. Den ersamen fursichitigen und weisen hern Andren Schönnprukh, zu den zeiten burgermaister und dem rat gemain der stat zu Wienn, an stat und zu hannden Ulreichs Wannkher gesessen zu Prukh an der Leytta seligen nagsten erben, wer die sein, umb achtzig Ungrisch guldein gerecht in gold und wag, die herkomen von den ii tl. d. so der obgenant Wannkher seligen auf dem benanten hawss des Giligen Waldner seligen gewesen ist mit recht von dem ersamen rat hir erlanngt und und behalt hat nach lautt des gerichtsbrief darub ausgangen, und sind zu bezalen auf die weinachten nagstkunfftigen an alles verziehen getrewlich und und ungeverlich. Actum an Sambstag vor dem Suntag Reminiscere in der vassten, anno etc. lxviimo, ut littera sonat.

Summavi s. x d.

Barbara Egkerin habet cedulam.

Nota Wolfgangen, Ulreichs Wankher hausf zu prukh an der Leytta seligen sun, gehorn zu seinem tail aus dem obgenant summa guldein xiiii tl. iiii s. xv d. und sind zum puch erlegt.