Eintrag vom 1457-03-07Informationen zum Dokument

Ulreich Stadelmair, der verber, hat versaczt sein haws, ynnerhalb Stubentor zenagst Micheln des smids haws gelegen. Den erbern Petern von Haidenreichstain und Hannsen, Wienner mitpurger hie zu Wienn, fraun Margreten des egenanten Ulreichs Stadlmair hausfraun seligen geschefftleuten, und zu handen Ulrichen und Dorothen, der benanten Margreten seligen kindern, die sy mit benanten Stalmair gehabt hat, und noch nicht vogtper sind in dem rechten als hernach geschriben stet, umb virhundert pfund pfening der swartzen münss, die denselben kindern von der ubertewrung des egnanten hauss zugebürnt nach lautt derselben irr muter seligen geschefft, das im statpuch geschriben stet. Also das die vorgenanten kinder Ulreich und Dorothe die obgenanten virhundert pfund pfening auf demselben haws ir lebteg unverchumert innhaben nuczen und niessen sullen und nach irm abgang sullen denn dieselben pfening auf wens die dann ligent erben und gevallen auf ir leiberben ob sy die gewunent und lembtig hinder in lassent ledichlichen. Wer aber das sy mit tod abgingen ee wenn sy vogtper wurden und zu irn bescheiden jarn kemen, so sullen denn die vorgenanten virhundert pfund pfening erben zwen drttail auf der egenanten Margreten ir muder seligen nagst erben und ain drittail desselben gelts durch got und irr selhails willen gegeben werden die sy denn von dem egenanten haws bekomen mugen als solhs saczs und der statrecht ist, ut littera sonat. Actum an Montag post Invocavit in der vasten, anno etc. lviio.

Summa iii tl. lxxx d.

Die obgenanten cccc tl. d. sind zu dem puch gelegt worden, an Freytag vor sand Michels tag, anno domini etc. lviio.